Abşeron rayon Mərkəzləşdirilmiş Kitabxana Sistemi

Abşeron rayon MKS
Bakı 2015 Avropa Oyunları
6 İyun , 2015

Rayon sakinləri alovun gəlişini hərarətlə qarşıladılar

Qədirbilən xalqımız I Avropa Oyunlarına böyük ruh yüksəkliyi ilə hazırlaşır

Birinci Avropa Oyunlarının həyəcanı Abşeron rayonunda da hiss edilir. Rayon sakinləri böyük həvəs və maraqla bu yarışın keçirilməsini gözləyirlər. Yüzlərlə könüllü artıq yarışın keçirilməsində öz əllərindən gələn köməkliyi göstərirlər. Tədbirin keçirilməsi ilə əlaqədar olaraq rayon ərazisində böyük infrastruktur layihələri vaxtından əvvəl yekunlaşıb. Ölkəmizin şəhər və rayonlarını qarış-qarış gəzən birinci Avropa Oyunlarının məşəli ötən gün axşam saatlarında Abşeron rayonunun mərkəzinə – Xırdalan şəhərinə gətirilib. Məşəl şəhərin girişində qurulan oyunların rəmzi qapısında rayon ictimaiyyəti tərəfindən böyük sevinc və alqışlarla qarşılanıb. Qarşılanma mərasimində milli rəqslər, oyunlar nümayiş etdirilib.

Kunq-fu idman növü üzrə dördqat dünya, ikiqat Avropa çempionu, əməkdar idman ustası Ramiz Yaqnəliyev birinci Avropa Oyunlarının rəmzi qapısında məşəli qəbul edib. Sonra 10 nəfər məşəlçinin yürüşünə start verilib. Onlar rayon sakinlərinin alqışları ilə məşəli bir-birinə ötürərək Rəsulzadə küçəsi, Heydər Əliyev prospekti, Zərifə Əliyeva və Qalubiyyə küçələrindən keçməklə 2,5 kilometr məsafə qət ediblər. Sonuncu məşəlçi, kunq-fu idman növü üzrə Avropa və dördqat dünya çempionu Rövşən Həşimov Heydər Əliyev parkında quraşdırılan səhnəyə qalxaraq məşəli alovlandırıb.

Avropa Oyunlarının çırağı yarışlar başa çatanadək saxlanılmaq üçün Heydər Əliyev Mərkəzinə təhvil verilib.

Bundan sonra Birinci Avropa Oyunları məşəlinin Atəşgah məbədində alovlandırılmasını əks etdirən videoçarx təqdim olunub. Məşəl estafetinin iştirakçısı, əməkdar idman ustası Ramiz Yaqnəliyev birinci Avropa Oyunlarının ölkəmizdə keçirilməsinin böyük nailiyyət olduğunu deyib: “İlk Avropa Oyunları ölkəmizin növbəti uğurudur. Azərbaycanda bu mötəbər yarışın keçirilməsi ölkəmizin beynəlxalq aləmdəki böyük nüfuzundan xəbər verir. Artıq idman ölkəsinə çevrilən ölkəmiz son illər bu sahədə böyük uğurlara imza atıb. İdmançılarımız dünya, Avropa çempionatlarında, Olimpiya Oyunlarında və digər beynəlxalq yarışlarda böyük uğurlar qazanırlar. Vətəndaşlarımız bu möhtəşəm idman bayramını böyük coşğu və sevinclə qarşılayır. Fəxr edirik ki, Azərbaycan müstəqilliyini bərpa etdikdən sonra qısa zamanda bu cür beynəlxalq tədbirə ev sahibliyi edir. Avropa Oyunlarının məşəlinin bizim şəhərdə də alovlandırılması yaddaşımızdan silinməyəcək”.

Birinci Avropa Oyunlarının Azərbaycanda keçirilməsindən qürur duyan şəhər sakini Sevda Əsgərova da təəssüratlarını bölüşüb: “Mən də bu möhtəşəm tədbirin ilk dəfə ölkəmizdə keçirilməsinə çox sevinirəm. Bu sevinci bizə bəxş etdiyinə görə dövlətimizin başçısı İlham Əliyevə dərin minnətdarlığımızı bildiririk. Bu tarixi hadisə sübut edir ki, ölkəmiz təkcə iqtisadi cəhətdən deyil, idman sahəsində də mühüm uğurlara imza atır. İlk Avropa Oyunlarının Bakıda keçirilməsi də bunun məntiqi nəticəsidir. Hesab edirəm ki, belə möhtəşəm tədbir ölkəmizin tarixində növbəti bir şərəfli səhifə açacaq. Azərbaycan vətəndaşı olaraq bu tarixi hadisəyə sevinir və qürur duyuram. Azərbaycan xalqı bu gün əsl bayram əhval-ruhiyyəsi yaşayır. Sevinirik ki, gündən-günə güclənən, inkişaf edən bir ölkənin vətəndaşlarıyıq”.

Bununla da birinci Avropa Oyunlarının məşəli bölgələrimizə səfərini uğurla başa çatdırdı. Məşəl estafeti Bakıda davam etdiriləcək.